Einn dagur í einu

Nýtt blogg!

2007-03-15T12:54:00.000Z

http://jahernamig.blog.is/blog/jahernamig/

Hvað getur maður gert?

2007-03-13T12:48:00.000Z

Eru þetta ekki fallegustu börn í heimi - okkur Grétari finnst það alla vega..................

"Sauma"-klúbbar.......

2007-03-09T09:01:00.000Z

Ég er svo heppin að tilheyra tveimur "sauma"-klúbbum. Annar er eldri en elstu menn muna (og ég neita algjörlega að tjá mig um hvað við höfum hist í mörg ár) - hinn aðeins nýrri.
Við "stelpurnar" sem vorum saman í bekk í Versló, höfum hist reglulega í þessi "2" ár síðan við útskrifuðumst. Ég get alveg staðið við það - vegna þess að þegar við hittumst - þá erum við nákvæmlega eins og við vorum í Versló. Yfirleitt endar kvöldið með maga-harðsperrum af hlátursköstunum og maskarinn hefur lekið og make-up dagsins þar af leiðandi lokið keppni!
Ef einhver myndi spyrja okkur, um hvað við hefðum talað - þá væri engin okkar fær um að svara því. Það eina sem við gætum sagt er: Það var alveg rosalega gaman! Við þekkjum hvor aðra gjörsamlega og stundum þarf ekki nema eitt augnaráð til að hlátursgusurnar fari aftur af stað.

Hinn klúbburinn minn er Drekaklúbburinn. Þar eru núverandi og fyrrverandi starfskonur Stöðvar 2. Það er auðvitað stærri hópur - "liggur í hlutarins eðli" - og síðast þurftum við að setja upp einskonar "talreglu" - svo ekki væri um 4-5 klúbba að ræða - í sömu stofunni. Þarna eru líka góðar vinkonur mínar. Við ræðum um gamla fyrirtækið - bæði í nútíð, framtíð og auðvitað fortíð. Við höfum - á milli okkar - séð hjólið fundið upp - aftur og aftur - misgáfaðir yfirmenn sem hafa komið með hallarbyltingu o.sv.frv.

Eitt er þó sameiginlegt með þessum tveimur klúbbum. Ég myndi ekki vilja án þeirra vera!!

Pilates - algjör snilld!

2007-03-02T08:44:00.000Z

Ég hef lengi átt þann draum að æfa Pilates - í mörg, mörg ár hef ég "lofað mér" að nú skyldi ég láta verða að því að fá mér alvöru Pilates-kennara og byrja. Núna eftir áramót lét ég verða að því - keypti mér 20 einkatíma hjá henni Kollu..... og þvílíka snilldin!

Ég mæti til hennar 2svar í viku - klukkutíma í senn - og Kolla fylgir mér hvert fótmál og sér til þess að ég geri allar æfingar réttar. Stundum læt ég Kollu vita að "mér finnist hún leiðinleg" - en mér þykir samt alltaf vænt um hana - eftir tímana.

Þetta eru "lúmskar" , mjög skemmtilega og óvenjulegar æfingar. Þarna uppgötvast "nýjir" vöðvar og "gamlir" brjótast fram. Ég hef oft bent Kollu á að "undir fitunni felast gæðin"......

Ég hef alltaf verið frekar liðug - svo stirnaði ég - en nú er ég liðugri en nokkru sinnum fyrr! Sumar æfingarnar hélt ég að ég myndi aldrei geta gert - en viti menn!

Kínverskar kótelettur....... ala Sunnubraut.....

2007-03-02T08:23:00.000Z

Ég tók mig til í gærkvöldi og bauð systkinum mínum í mat. Ég eldaði "kínverskar kótelettur" - eins og mamma bjó stundum til. Þær eru þannig - kóteletturnar eru úrbeinaðar og fituhreinsaðar, vafðar með beikoni og mareneraðar í sólarhring í legi sem er búinn til úr: Teryaki, Soja, Worshestersósu og fersku engifer...... síðan grillaðar í ca. 7-10 mín. Nammi, nammi.... Svo var ég með "Cremé Brulee" í eftirrétt.
Það var mjög gaman að fá mín fallegu systkin og þeirra ektamaka í mat.... Og eins og lög gera ráð fyrir (í minni fjölskyldu) þá var mikið hlegið...... Lindu mágkonu fannst hún t.d. svo fyndin að hún gat varla sagt okkur brandarann - af því hún hló svo mikið sjálf.......... Minnti mig óneitanlega á ónefnda vinkonu mína - fyrsti stafurinn byrjar á Guðný Helga - henni finnst hún líka fyndin!

Ég er að hugsa um að láta "atvinnumenn" á skyndibitastöðum - elda fyrir mig um helgina!

Matvöruverslanir og önnur skemmtiatriði.......

2007-02-23T08:42:00.000Z

Við íslendingar "seljum" dýrasta vatn í heimi. Ef keypt er skinka á 2000 kr. kílóið - þá erum við um leið að kaupa 250 ml. af "vatni" á 500 kr. - eða 2000 kr. líterinn. Og af því að við nennum ekki að mótmæla þegar við erum tekin svona heiftarlega í xxxxxx - þá viðgengst þetta áfram.
Við missum okkur, með reglulegu millibili, yfir allskonar hormónum og öðrum viðbjóði (sem við vitum ekkert um) sem "Kaninn" er að sprauta í sínar kjötvörur og myndum aldrei í lífinu láta þannig ógeð inn fyrir okkar varir........ en kaupum endilega salt-vatns-?????-blandaða skinku eins og ekkert sé....... Tvöfaldur mórall!

Við kaupum matvöruna (þó aðallega landbúnaðarvörur) með skrilljónprósenta álagningu í verslunum þar sem við erum "keyrð áfram" við kassann , látin drífa okkur í að setja sjálf ofan í pokana sem við kaupum á 15 kr. til þess að verslunareigandinn geti svo hreykt sér í blöðum fyrir að hafa gefið "pokasjóðinn" hingað og þangað...... Við fáum drápsaugu frá láglaunuðu krakkarassgötunum sem eru á kassanum - ef við erum ekki að slá heimsmet í pokaíröðun - um leið og við borgum svimandi upphæðir fyrir....... Drífa sig - drífa sig....... Svo klöngrumst við út með kerruna - fulla af rándýrum - vatnsbættum matvörum - yfir snjó og aðrar torfærur - og svo skal skila kerrudruslunni á sinn stað - svona til þess að "kaupmaðurinn" þurfi ekki að borga öðru krakkarassgati léleg laun til að ganga frá henni svo að hún skemmi ekki bílinn þinn (á kostnað verslunareigenda) þar sem hún fýkur um í þessu 20 metra á sekúndu óveðri sem geysar þá stundina.
Ég fer t.d. með Æðruleysisbænina 2svar áður en ég fer í matarverslanir - 4sinnum inni í versluninni, þegar það er búið að merja hásinarnar á mér nokkrum sinnum með vítaverðum aftanákeyslum og vitskertum smábörnum sem ættu frekar að vera heima hjá sér að "kubba" meðan foreldrarnir versla - og svo er bænin þulin stanslaust í "vitlausu" röðinni við kassann - vegna einskærs kvíða við "niðurröðunarheimsmetið" í pokana.......

Annars er ég bara nokkuð hress - en þið?

Lærdómsríkir dagar.......

2007-02-21T13:22:00.000Z

Ég er búin að læra margt síðastliðna daga. T.d. hvernig á að setja upp forkeppni Eurovision - fyrir lítinn pening...... (þ.e. fyrir RUV) Það gekk svo langt að ef við (höfundar) vildum hafa reyk (þurrís) á sviðinu í útsendingu - þá þurftum við að kaupa hann sjálf og koma með í útsendingu og að auki borga manni ca. 40.000 kr. fyrir að sjá um "reykvélina"...... Við slepptum reyknum!

Ég lærði líka hvernig er að vinna með "prófessjónal" fólki - snilldar söngvara, bakröddum á heimsmælikvarða, stílista og danshöfundi...... Allt fólk sem er starfi sínu vel vaxið.

Svo hún Helena hjá BaseCamp - hún á líklega kistu heima hjá sér - fulla af þolinmæði og æðruleysi - kista sem hún getur farið í og fyllt á sig - eftir þörfum.

Ég lærði líka að tapa - ekki það - ég er fullkomlega sátt við að hafa náð öðru sæti í þessari keppni - þó gaman hefði verið að fara til Finnlands - fyrir Íslands hönd - með þessu frábæra listafólki.....
Ég segi bara eins og Jóhanna forðum - Minn tími mun koma!!!

Svo er að lokum smá skot á Kristján Hreinsson - textahöfund þjóðarinnar.....;)
Hann þurfti 9 texta til að lenda í 1. sæti - ég bara einn til að lenda í 2. sæti............
Sem sagt: Sigtryggur vann!!!

Afmælisstelpan mín!

2007-02-13T12:23:00.000Z

Þessi fallega unga kona er orðin 21. árs gömul - en það passar engan veginn þar sem svo stutt er síðan hún fæddist.....

Hún er bjútíið hennar mömmu sinnar og betri og fallegri dóttur - getur engin móðir óskað sér.

Til hamingju með daginn - mömmusinnarbestablóm!

p.s. Hjördís Perla - það er grundvallaratriði að "loka" klósettinu...... ;)

Live and let live.........

2007-02-07T08:47:00.000Z

Ég tel mig vera ópólitíska - en ég ætla samt að skila auðu í vor. Ég get ekki sætt mig við það sem er í boði. T.d get ég ekki hugsað mér að kjósa Sjálfstæðisflokkinn - þar sem mér finnst að menn/konur sem brjóta af sér sem fulltrúar fólksins - eigi ekki að komast "aftur" í sömu aðstöðu. Ég líki því við að setja sælgætisgrís inn í sjoppu þ.e. bak við búðarborðið........

Svo er þetta með stjórnmálaumræðu í útvarpi og sjónvarpi. Að horfa á fullorðið fólk tala ofan í hvort annað. Fyrir mér er það dónalegt að tala þegar annar hefur orðið. Og á endanum nær maður engu samhengi í umræðunum - þá stend ég yfirleitt upp og slekk...........

En - live and let live........

The Secret........

2007-01-30T13:54:00.000Z

það er merkilegt (og þó kannski ekki) hvernig hlutirnir gerast í lífinu.

Ég vaknaði óvenjulega snemma á sunnudagsmorgunin - svona miðað við að ég hafði verið í Eurovision-stússi á laugardaginn og langt fram á kvöld. Mér datt í hug þennan morgun - eftir að ég hafði borðað morgunmatinn - að kíkja aðeins á Rapsody-inn minn. En þar inni eru allskonar þættir, myndir, glærur og annað sem er geymt þar.
Ég rak augun í þætti (sem ég hafði ekki tekið eftir áður) sem heita The Secret. Og þar sem ég er (sem betur fer) forvitin að eðlisfari - ákvað ég að kíkja aðeins á þetta.

Þvílíka snilldin - þarna, þennan morgun opnuðust augu mín - enn og aftur - fyrir nokkru sem að ég veit að á eftir að breyta lífi mínu algjörlega.
Þeir sem segja frá leyndarmálinu - gera það á þann máta að það er eiginlega ekki annað hægt en að hrífast með.
Leyndarmálið er einfalt og ef maður vill breytt líf og lífsviðhorf - þá er bara að lifa leyndarmálið.

Ég mæli með því að allir fái að vita Leyndarmálið!
Ég mun allavega gera þeim sem vilja - kleyft að upplýsast............

One down - two to go........

2007-01-29T08:52:00.000Z

Jæja - með mikilli hjálp frá fjölskyldu, vinum, samstarfsfélögum og öðru fólki með "góðan" tónlistarsmekk er fyrsta áfanganum náð...... Við, Grétar og Kristján - og auðvitað Friðrik Ómar - viljum þakka öllum sem studdu okkur á laugardagskvöldið.

Ef tónlistarsmekkur ykkur, vinátta, starfsvettvangur eða ættarbönd - breytast ekki fram til 17. febrúar - þætti okkur vænt um að fá stuðninginn aftur........

Því eins og segir hér að ofan - on down - two to go.............

Eldur - í Eurovision............

2007-01-22T09:22:00.000Z

Jæja - nú er lagið tilbúið og verður byrjað að spila það á RÚV í dag. Mikil vinna að baki hjá mér - gera texta - breyta texta - bæta við texta - endurskoða texta - laga texta - og klára svo að lokum texta............
Ég fékk auðvitað lánaða dómgreind - svona hér og þar - en þetta gekk svo að lokum. Svona er auðvitað ekki hrist fram úr erminni - og við hjónin erum ekki alltaf sammála um hvernig þetta eigi að vera - en sættumst þó alltaf - svona að lokum.......
Við Grétar og Kiddi erum tiltölulega sátt við afraksturinn og vonum það besta á laugardaginn kemur.
Vonandi kann íslenska þjóðin að meta heimilisiðnaðinn hjá okkur!

Mig langar að biðja ykkur sem kíkið hér inn að kjósa nú Eldinn á laugardaginn kemur!

Kuldaboli - og "slow-mo" umferð......

2007-01-10T09:02:00.000Z

Nú er kallt - loksins alvöru vetur, stjörnubjart, kallt og fallegt. Það eina sem truflar mig er þetta óþolandi "marr" í snjónum. Álíka óþolandi og þegar einhver bítur í frostpinna....... það á ekki að bíta í frostpinna - sjúga.......
Það fer jafn mikið í mig og ég fæ jafn mikla gæsahúð - eins og fyrir suma að draga neglurnar eftir krítartöflu, bíta í bómull eða skrapa hníf eftir postulínsdisk. Það þoli ég - en ekki þegar bitið er í frostpinna, klakar bruddir eða þetta helv. marr í mikið frosnum snjó - gæsahúð.........
Við Prins látum okkur nú samt hafa það að fara í göngutúra - þó það frjósi í nefinu á okkur báðum ;)

Og alltaf verðum við svo hissa á snjónum - þ.e. þegar um er að ræða að keyra bíla.... ég var á meðalhraðanum 5 km.kl.st á leiðinni í vinnuna í morgun. Allir jafn hissa á því að það er hálka - Izin zat wieeerd......????

Svo er bara að vona að potturinn í Skorradal verði í 39° - næst þegar ég kem uppeftir - ef ekki þá er bara að taka fram skautana!

Þrjár litlar mýs.........

2006-12-28T15:39:00.000Z

Ok - það er orðið opinbert - ég er morðingi!

Greyið litlu "Fuffurnar" allar þrjár, voru "stone-dead" þegar ég loksins fór í Skorradalinn að athuga með músagildruna. Ath. ég var búin að kaupa "góða" gildru - svona í stíl við mig - gildru sem að hægt er að sleppa músunum lifandi úr......
But no - mín mætti of seint - þær voru dauðar, þ.e. hver annari dauðari. Búnar með harðfiskinn - og hluta af hvor annari líka.

Er ekki einhver sem veitir músamorðingjum áfallahjálp????

Plííííís...........

Músin sem læddist - og hvarf svo.......

2006-12-04T11:17:00.000Z

Ég var send í Húsasmiðjuna í Borgarnesi á laugardaginn var. Þar átti ég að versla músagildru - til að leggja fyrir Guðfinnu "Fuffu" hagamús - sem ákvað af skiljanlegum ástæðum - að flytja í litla útihúsið við sumarbústaðinn yfir veturinn.
Við hjónin erum ekki alveg sammála - þegar mýs eru annars vegar, ég vil gefa þeim að borða - en Grétari finnst þær vera hin verstu skaðvaldar. Það er gott að vera ósammála stundum.

Ok - ég fann músagildru - sem veiðir mýs - en drepur þær ekki þ.e. - ég gat boðið Fuffu í mat og sleppt henni svo út úr "matsalnum" eftir að hún kláraði harðfiskinn....... En - málið er - annað hvort er Fuffa mjög gáfuð - eða hún fór í helgarfrí! Hún lét ekki sjá sig - hafði engan áhuga á harðfisk - og ég er frekar óhress með hana. Núna er hún orðin frekar matvönd - eða bætt gríðarlega við greindarvísitöluna......... Kemur í ljós - kannski um næstu helgi - ef ég kemst uppeftir til að athuga með hana. Ég varð nefnilega svo pirruð á henni - að ég skildi eftir "matsalinn" að vísu með næringu - og verð bara að vona að hún hafi rænu á að spara við sig matinn, alla vega þangað til að ég kemst aftur uppeftir til að "tjékka" á henni.

Prins lét þetta allt fram hjá sér fara.... Hann hitti leikfélaga - íslenskan hund - og þeir náðu að gera heiðarlegar tilraunir til ýmiskonar slagsmála og gagnkvæmrar "misnotkunar".....
En við Hjördís Perla komumst enn og aftur að því að Prins verður seint talinn mikill "varðhundur". Félaginn kom og spurði eftir honum eftir kvöldmat! En Prins svaf - og tók ekki eftir heimsókninni................. lélegt!

Duglega Dísa.......

2006-11-29T12:30:00.000Z

Ég hef tekið ákvörðun um að verða "Duglega Dísa" - byrjuð í nýrri vinnu, er byrjuð í ræktinni og fór meira að segja í Blóðbankann í morgun og lagði inn...... Hvað vill fólk hafa það betra.

Er að vanda mig í að detta ekki í meðvirkniköst - og það gengur ágætlega. Fyrir suma gæti virst eins og ég væri fúl - en það tekur bara svona á mig að vera ekki að gera "heiðarlegar" tilraunir til að breyta öðrum. Það er nefnilega svoldið síðan að ég fattaði að það gengur ekki. Fólk má bæði gera eins og það vill - og hafa sjálfstæðar skoðanir. En það er ekkert mjög langt síðan að ég lærði - að ég má það líka þ.e hafa skoðanir og gera það sem ég vil.

Stefni á bústaðinn um helgina - ég og Perlan - og auðvitað Plinsi ofurhundur.....

Sweeeet............

Sungið i klosettbursta.........

2006-11-13T23:11:00.000Z

Georg Micheal - Gudda - Disa - Viðar - Inga Dora..........ég sá allt þetta fólk í Kaupmannahöfn um helgina. Ég mun alls ekki leggja mat á hvert þeirra heillaði mig mest en eitt þeirra söng afburða best af þeim öllum!

Helgin var æðisleg - alltaf gaman að koma til Köben. Æðislegt að hitta Dísu vinkonu (eins og alltaf) - Gudda og Inga Dóra voru fyndnar, alla vega Guddan (að henni fannst sjálfri) Viðar mágur minn hefur svo sem ekkert ófríkkað og ég hlakka til að fá hann aftur til landsins.

Ég söng í "klósettbursta" - Ingu Dóru til mikillar gleði - í tíma og ótíma. Inni í verslunum og á veitingahúsum. Mér var samt bannað að taka hann með á tónleikana....... skrítið!
Klósettburstinn var hluti af "ljótugjöf" frá Guðný Helgu - og nú hefst leitin að gjöfinni - til að toppa hennar gjöf. Bíddu bara Gudda mígildi.......... Ljótugjöfin var tekin upp í viðurvist votta - eins og venjulega og gladdi aðra meira en okkur Grétar.

Plinsi var í pössun hjá Svanhildi frænku og tók að sér að vera "getnaðarvörn" - það verður ekki farið nánar út í það að svo stöddu........

Skornir fundnir........

2006-10-31T23:07:00.000Z

ég fann loksins skammdegisskó. Þeir biðu alveg rólegir eftir mér í verslun í Kringlunni, svartir og loðfóðraðir. Þeir eru algjörir torfæruskór, upphækkaðir og með "muddera"....... Meira að segja innbyggðir mannbroddar.
Ég vil taka það fram að skórnir eru mínir og verða ekki lánaðir (frekar en gítarinn hennar Hjördísar systur) ekki einu sinni gegn vægu gjaldi.
En ég er tilbúin að gefa upplýsingar um hvar hægt er að nálgast svona tryllitæki!!

Skammdegisskornir........

2006-10-26T14:05:00.000Z

Ég hefði ekki átt að vera svona grimm gagnvart gömlu skammdegisskónum mínum. Nú er aftur komið skammdegi og ég búin að senda gömlu skóna til Guðs........

Fann þessa skó á síðu þar sem þeir unnu "ljótu skór vikunnar" um daginn. Þetta er ekki alveg það sem ég er að leita að - heldur skór sem geta labbað í snjó, slyddu, rigningu og drullu - með mér og Prins (úlfhundinum).

Ef einhver getur gefið upplýsingar um það hvar þannig skó er að finna - vinsamlegast látið mig vita.

Þeir (skórnir) mega gjarnan vera loðfóðraðir - svo tásurnar mínar verði ánægðar - og heitar!

Að treysta "vinum".......

2006-10-11T12:22:00.000Z

ég er svo hissa...... en þó ekki. Það er nett 4. spors vinna að fara í gengum traust til vina. Ég vil að gefnu tilefni benda fólki sem mér þykir vænt um að treysta ekki "vinum" sínum. Sérstaklega ekki ef þið ætlið að eiga viðskipti við þá. Það er gott og blessað að fara í viðskipti með vinum sínum - en í Guðs bænum - hafið allt - og þá meina ég allt - skriflegt........

Þetta hljómar hálf "paranojað" - en enginn veit - fyrr en allt í einu.......

Ég mun hafa viðskipti skrifleg í framtíðinni..... en hef þó grætt einn hlut - ég veit hverjir vinir mínir eru.

Og ég er heppin - ég á mjög góða vini!

Bara að muna að anda.......

2006-10-07T16:20:00.000Z

það er gott að minna sig á það að lífið gengur - þó að stundum sé maður með - og stundum á móti. Krosstré brotna, klettar molna niður og stundum syndir maður á móti straumnum. Svo er stundum allt á beinu brautinni og meira að segja geitungarnir velja aðra glugga að fljúga inn um...........
Hvort sem maður er með eða á móti - er gott að minna sig á það að anda - anda inn og svo anda út - endurtakist (alla ævi skilst mér) aftur og aftur.
Ég "klíf skriður og skríð kletta" og svo "andar suðrið sæla" - þetta er bara svona!

Það eina sem ég þarf víst að muna - er að anda - og miðað við aldur, menntun og fyrri störf - þá ætti ég að ná því - eða hvað haldið þið?

100 ara afmæli og margt annað skemmtilegt........

2006-09-30T19:10:00.000Z

Síminn hélt upp á 100 ára afmælið sitt í gær og hafði ég gaman að því að vera með í því að gera þetta eins skemmtilegt og raunin varð. Mikið um dýrðir - og þreyttar tær í lok kvöldsins!
Í Borgaleikhúsinu fengum við að sjá og hitta t.d. Andrew Zolli - en hann er "futureisti" sem vinnur við það að "sjá" hvað gerist hjá okkur í framtíðinni - svona miðað við aðstæður í dag og hraðann í allri tækniþróun.
Síðan kom maðurinn sem allir biðu eftir - Rudi Giuliani - fyrrverandi borgarstjóri í New York. Þvílíkur "útgeislunarbolti"! Hann sagði frá því hvaða kostum maður þarf að vera gæddur til að vera leiðtogi - og hvað maður þarf að tileinka sér - til þess að halda þeim titli. Hann byrjaði á því að spyrja hvort leiðtogar væru fæddir þannig - eða lærðu að vera það. Ég svaraði inni í mér að þeir væru "fæddir" - hann sagði að þeir lærðu það - en þyrftu auðvita að vera fæddir!!
Það var það sem ég meinti - fyrst fæðist maður - svo verður maður eitthvað.........
Hann sagði okkur frá 11. september 2001 - það sem þessi maður fór í gegnum þann dag - og næstu daga - var ótrúlegt.

Svo var farið í Laugardalshöll - og þar var hinn svokallaði "vááá-faktor" Ótrúlega flott show - flott uppsetning - og allt eins gott og hægt er að óska sér.

Eftir það - þá gáfust tásurnar mínar upp - sættu sig þó við að aðstoða mig við að bera kommóðu út í bíl - og hvíldu sig svo á leiðinni upp í Skorradal - þar sem þær eru núna með mér - og bíða eftir að fara aftur í sturtu - og svo í pottinn - ætla víst að kíkja upp úr pottinum með mér - til að skoða stjörnunar!!! Bæði ég og tásurnar - fílum stjörnurnar!

Steinar úr glerhúsum.......

2006-09-22T10:33:00.000Z

það er gott að minna sig á þetta með að kasta steinum úr glerhúsum. Ég er búin að fylgjast með "grjótkastara" í smá tíma. Mér þykir vænt um hrekkjusvín - en þegar þau eru farin að meiða djúpum sárum - þá er kominn tími til að hætta að hrekkja.

Það lýsir okkur hrekkjusvínunum - hvernig okkur líður. Þegar ég særi aðra dýpst - þá líður mér verst. Og ef ég ´"kúka upp á bak" þá get ég ekki kennt öðrum um slæma lykt.

Það skal hafa aðgát í nærveru sála - sérstaklega ef sálirnar eru ennþá á barnsaldri - því að - barnssálir koma til með að markast af hrekkjusvíninu - alla ævi.

Við ættum því öll að viðurkenna okkar eigin líðan, okkar eigin mistök og síðast en ekki síst - hreinsa sjálf okkar eigin skít!

Haustið er að koma......

2006-09-08T12:13:00.000Z

Fallegasti árstíminn er að koma. Litirnir sem koma með haustinu, finnast mér fallegastir af öllum. Tími til að kveikja á öllum kertunum sem ég er búin að sanka að mér: Ilmkerti - af öllum stærðum og gerðum.
Ég ætla að nota tækifærið og klára söguna mína - hún þarfnast núna bara að verða skrifuð..... Allar hugmyndir eru tilbúnar (eða að mestu leiti) og nú er bara að klára að skrifa.
Ég er svo blessunarlega stolt af systkinum mínum - þau eru frábær - og við öll til samans erum auðvitað snillingar. Ef þið trúið mér ekki - spurjið þau bara!

Afi kafi i Efstaleiti.....

2006-08-04T11:25:00.000Z

Hann pabbi minn verður 80 ára á þriðjudaginn kemur - 8. ágúst! Hann er flottur pabbi með góðan húmor. Hann er samt orðinn svolítið gleyminn enda með heilarýrnun.
Við fengum að vita í dag að hann er búinn að fá pláss á Droplaugarstöðum, nokkuð sem hann er búinn að bíða sjálfur eftir í nokkra mánuði. Hann getur þá farið að setja á sig meira af rakspýra og sjarmera dömurnar þar upp úr skónum.
Ég á flottasta pabba í heimi!

Fallegasta og besta systir i heimi......

2006-07-17T10:33:00.000Z

á afmæli í dag!!

Mér skilst að þessi dagur (og dagurinn á undan og á eftir) sé kallaður: Hinn íslenski afmælisdagur.

Til hamingju með daginn - elsku Hjördís systir mín.

Dagurinn i dag.....

2006-07-01T20:19:00.000Z

það er sól í Skorradalnum. Skrítið að sjá hvernig skýin liggja í kringum dalinn - en virðast ekki komast alla leið yfir vatnið. Þess vegna erum við hérna í sólinni - þó það rigni í kringum okkur.
Greyið Prins er búin að fá að finna fyrir því að "mamma" hans er hætt að reykja. Ég var vön að reykja mikið þegar ég var að semja texta - en í dag tók ég göngutúra í staðinn fyrir sígarettur. Þannig að Prins er "genginn upp að öxlum" og situr núna með tunguna lafandi, þreyttur og þyrstur.

En mér er alveg sama - búin að semja 2 texta í dag - og Prins má vara sig - ég ætla nefnilega að semja einn enn á morgun!

Við Prins fitnum ekki á meðan..................

Heimskar rollur og Ulfhundurinn!

2006-06-17T12:59:00.000Z

Kindur eru heimskar - líklega heimskustu dýr á Íslandi. Þá er ég að tala um þegar þær "þurfa" að fara yfir veginn, rétt áður en að bíllinn kemur, liggja Á veginum, hlaupa "eftir" veginum þegar flautað er á þær og svo þetta óþolandi jarm þegar maður á síst von á því. Lömbin eru falleg - en þau stækka og verða að ljótum, heimskum rollum. Ég hef heitið mér og öðrum að auka verulega lambakjötsát á þessu ári og öll næstu ár........ Og af hverju er ég svona reið út í rollurnar - jú - þær eru búnar að "fatta" að grasið er grænna - hinu megin við girðinguna og með einhverri óskiljanlegri heppni komist inn á afgirt svæðið hjá okkur, étið blóm hjá nágrönnunum og brotið tré úr hekkinu sem ég er búin að hlúa að og dútla við í 2 ár! Helv. rollur.......

Svo er það "Úlfhundurinn" - Prins, hunda fallegastur og hugrakkastur...... eða svo hélt ég. Hann verður rosalega ábyggilegur þegar hann sér rollurnar út um bílgluggann. Ég er svo nokkrum sinnum búin að fara með hann í göngutúr - til að reka helv. rollurnar út af svæðinu - og svei mér þá ef ég sé ekki (vonandi) úlfhundinn gægjast út um augun á Prins - ja... eða ekki. Honum er auðvitað ekkert vel við þessi kvikindi - en hann lætur þær alveg eiga sig.

Það er ég samt viss um - að þegar Prins liggur hér á "hermannadýnunni" sinni - þá dreymir hann sjálfan sig reka allar rollur í heiminum út úr öllum görðum. Hann er "ofurhundurinn" sem bjargar trjánum hennar mömmu sinnar.......... eða hvað sýnist ykkur??

Kaupstaðarferðir.......

2006-06-15T20:21:00.000Z

við hjónin fórum í kaupstaðarferð í dag. Ná í hitt og þetta sem vantaði bæði til andlegrar og líkamlegrar næringar. Það er gaman að fara í kaupstaðinn. Við hittum allskonar fólk t.d. eina frænku, einn frænda og líka virkt fólk, óvirkt fólk og einn ofvirkan líka.
Ég var að velta fyrir mér þegar talað er um að maður sé manns gaman. Það fer ekkert á milli mála. Við þurfum að hitta annað fólk, sýna okkur og sjá aðra (eins og mamma sagði alltaf). Heyra fréttir af frændfólki og hvað hefur drifið á daga fólksins í kringum okkur. Ef ekki - þá á maður á hættu að verða "sjálfhverfur". Það vil ég ekki. Ætla að æfa mig í að vera ekki sjálfhverf.

Svo þegar ég er búin að því - þá ætla ég að taka upp strangar æfingar í auðmýkt.

Ekki veitir af................

Veðrið i Skorradalnum........

2006-06-10T23:46:00.000Z

er ótrúlega óhugnarlegt og stórbrotið stundum.
Ég er búin að vera að fylgjast með þokunni koma inn dalinn og fela bústaðina - hinu megin við vatnið.
Stundum finnst mér ég vera í einhverskonar ævintýralandi.

Að horfa a vorið koma.......

2006-06-03T00:47:00.000Z

ég er búin að vera í Skorradalnum í viku og hef verið að fylgjast með vorinu koma. Það eru auðvitað ótrúleg forréttindi að geta verið vitni að svona undri. Skógurinn grænkar með hverjum deginum og lyktin er einstök. Rigning, rok, sól og logn - stundum allt sama daginn.
Prins er búinn að njóta þess að fá að fara í "skógarferðir". En núna er komin Hvítasunnuhelgi, fólk farið að mæta á svæðið - og þá fer hann bara með okkur - í bandi. Hann á það nefnilega til að finna sér einhvern sem er t.d. að grilla - og setjast þar að...... hann gerir næstum allt - fyrir mat! Svo er hann nokkurskonar "Cable guy" í bústaðnum hér fyrir neðan - það býr nefnilega tík þar, Prins er skotin í henni - en hún ekki í honum.........

Ég ætla að vera hér í einhvern tíma í viðbót - njóta þess að vera hér með mínum - og Prins. Heilsan batnar með hverjum deginum og ég finn það........ sem er batamerki.

Það væri hægt að markaðssetja þetta svæði fyrir fólk með minn sjúkdóm! Hugmynd.........

Student Hjördis Perla........

2006-05-26T11:25:00.000Z

þá er komið að því..... Hjördís Perla er að útskrifast sem stúdent frá Menntaskólanum í Kópavogi. Það sem er svo gaman við það er að ég get verið viðstödd!! Útskriftin er frá Digraneskirkju í dag og svo ætlum við að hafa veislu í salnum hjá afa í Efstaleiti kl 17.00. Á meðan Hjördís Perla var hjá okkur á Florida fékk hún að vita að hún komst inn í Háskólann í Reykjavík - og mun nema lögfræði þar næstu 4 árin........
Duglega Dísa!

Ég viðurkenni vanmatt minn.........

2006-05-07T16:03:00.000Z

Ég er búin að vera hérna í Skorradalnum alla helgina og ætla að vera hér - alla vega í nótt líka. Ég er búin að hvílast vel, yfirfara síðustu mánuði og taka ákvarðanir í samræmi við heilsufar mitt.
Það er ekki alltaf auðvelt að viðurkenna vanmátt sinn - en ég get ekki annað núna. Ég er ekki nógu hraust til annars og það á ég að viðurkenna. En það er þetta þegar að "krosstrén brotna" sem er fast í hausnum á mér. Ég Á að vera svo dugleg, ég Á að geta tekist á við allt, ég Á að standa eins og klettur........ en það er ég sem segist "eiga" að vera allt þetta - enginn annar.
Núna er bara þannig komið að ég get ekki tekist á við allt sem mér finnst ég "eiga" að takast á við og þá geri ég bara eins og mér er sagt - fæ lánaða dómgreind og viðurkenni vanmátt minn........

Þingholl - stresslosandi!

2006-04-29T18:35:00.000Z

Jæja - komin í Skorradalinn - búin að upplifa allar tegundir af veðri. Rigning, rok, sólskin og allt nema snjókoma. Ég vaknaði í nótt (ekki alveg viss hvar ég var) og hressist verulega yfir því hvað það ringdi mikið á Florida..... svoldið rugluð. Við Prins fórum í göngutúr í rigningunni og rokinu - bæði hress með veðrið. Það er ótrúlegt hvað stressið lekur af mér hérna í sveitinni. Næ alveg að losa úr streitu-skúffunni!!
Er búin að vera að hafa samband við vini og vandamenn, heyra í sponsíum og er byrjuð að láta mér hlakka til að fara á fund á miðvikudaginn!

Áfram Ísland!!

Einn fyrir Moniku........

2006-04-25T19:33:00.000Z

Vegna tilkomu vorsins og sumarsins á íslandi, bað Monika vinkona mín - og systir í Kristi - mig um að endurvekja gamla færslu. Þessi færsla á við á hverju ári - sökum veðurfars á Íslandi. Færslan á ekki við í Florida - þar sem veðrið er yfirleitt svona: Sól, sól, sól og svo meiri sól. En hér er færslan:

Var að velta fyrir mér hvort "skammdegisskórnir" mínir viti af því að það fer að koma að kompuferð - fyrir þá. Bráðum er orðið of bjart til þess að þeir geti verið ofan jarðar.
Þeir þola nefnilega ekki dagsbirtu - krumpast allir og kveljast!
Gott á þá - hverjum er ekki sama.
Það er að koma vor og þá fer ég í "hina" skóna.
Vei vei vei!!

Endalaus heppni.......

2006-04-23T23:59:00.000Z

Ég var að hugsa áðan hvað ég er heppin í lífinu.
Mér hefur auðvitað verið úthlutað mínum skammti af veseni og vandræðum en ég held að ég hafi svona næstum komist klakklaust í gegnum allt. Ég þakka fyrir það! Og það góða við vesen og vandræði - er að maður lærir og lærir.

Ég vil líka þakka fyrir vini mína - vá - ég er endalaust heppin þar - ég á svo góða vini.
Vini sem eru alltaf þarna - í góðu og slæmu. Maður finnur alveg hverjir þeir eru - þegar maður tekur utan um þá!

Ég á líka vinkonu sem er algjör snilld - miðað við aldur, menntun og fyrri störf - þá er hún
snillingur - og ég er endalaust heppin að eiga hana.

Við eigum svo falleg börn.....

2006-04-21T00:10:00.000Z

falleg og skemmtileg. Þau komu 7 stk. þ.e. Guðrún Inga, Óli (tengdasonur) Óli Grétar (barnabarnið), Pétur Ben, Gréta Karen, Eva og Karen.
Við erum búin að fara víða. Í Wet and Wild, Sea World, á ströndina í Clearwater og fleira og fleira....... Það er búið að versla, sóla sig, versla meira, borða góðan mat, sóla sig aðeins meira og borða aðeins meira!!!
Við keyrðum þau áðan út á flugvöll og ég slapp við að gráta á flugvellinum - en skældi aðeins á leiðinni heim.......
Það sem maður getur saknað þeirra - þó þau séu varla farin!

En svo voru 2 eftir heima: Hjördís Perla - sem kemur til okkar í júní - og Kristján Ólafur - sem kemur vonandi sem fyrst!

Ég velti því stundum fyrir mér - hvað við erum heppin - að eiga öll þessi börn, hvert öðru fallegra og skemmtilegra!

Þvílíkur fjársjóður!

Ég sakna þess að hlægja...... mikið!

2006-04-08T23:36:00.000Z

Ég var að velta fyrir mér hvers ég saknaði mest frá Íslandi. Auðvitað sakna ég barnanna mest, fjölskyldunnar, vinanna og svoleiðis - en svo gerði ég mér grein fyrir hvað það var sem ég virkilega sakna, það er hláturinn.
Þeir sem þekkja mig og mína - vita að við gerum mikið af því að hlægja - hátt og lengi - af hlutum sem öðrum finnst kannst ekkert sérstaklega fyndið. Ég sakna þess að hlægja með Hjördísi systur, Guðnýju Helgu, frænkunum öllum og vinum mínum upp til hópa. T.d. sakna ég þess að vera ekki heima - núna þegar Guðný fær "ljótu gjöfina" - ég vona að mamma hennar fatti það að hún er ekki send til hennar, þó ég hafi skrifað hennar nafn á pakkann. Ég vissi bara (frá Guðný) að þau (foreldrarnir) væru búin að taka hana af dyrabjöllunni, póstkassanum - og í raun reynt að afmá öll merki um hana!
En gjöfin er ætluð Guðný - engum öðrum - og ég vildi gjarna vera á svæðinu þegar hún opnar hana. Við erum að tala um "ljótu gjöf" sem á eftir að lifa lengi - og jafnvel slá öll met!

Það er sagt að hláturinn lengi lífið - og ég ætla að lifa mjög lengi!

Allir sem eru til í að hlægja eru velkomnir í heimsókn.

Hvar er He-Man þegar maður þarf a honum að halda?

2006-04-05T17:55:00.000Z

Núna eru til dæmis 2 svartir snákar inni í "sundlaugar-screeninu" hjá mér. Grétar er á fundi niðri í Orlando og ég er ein heima að búa til "hernaðaráætlun" til að losa þá við mig - og mig við þá!

Búin að flétta þeim upp á Netinu og þeir eru ekki eitraðir - sem betur fer.

Það var opið inn í screenið - þar sem ég var að vökva blómin með garðslöngunni (sem þeir hafa líklega haldið að væri mamma þeirra) og elt hana inn.....???!!!

En He-Man kemur bráðum og reddar öllu.

Land litillar rigningar og mikillar solar......

2006-04-04T14:40:00.000Z

Auðvitað hlaut að koma að því - ég upplifi skort á rigningu. Verandi íslendingur í húð og hár - hljómar þetta skringilega. En svona er þetta - núna er hitinn að aukast og það hefur ekki ringt hér - tja... bara ca. 2 klst. síðan í lok janúar.
Það er ekki mikil rigning!

Við erum farin að spara vatnið - það kostar AÐEINS meira hér en heima og svo megum við bara vökva 2svar í viku. Það er misjafnt mannanna böl!

Ættingjar og vinir...... og besta systir i heimi!

2006-03-29T20:23:00.000Z

Það er vitað mál - að í lífinu getur maður valið sér vini, en ekki fjölskyldu. Maður fæðist inn í fjölskylduna og situr uppi með fólk, hvort sem manni líkar við það eða ekki.

Ef ég mætti velja mér systkini - þá myndi ég velja þau sem ég á núna. Ég á 2 bræður - ólíka en ótrúlega góða menn og fallega. Ég elska þá báða endalaust - og þeir eru alltaf til staðar fyrir mig - og ég verð alltaf til staðar fyrir þá.

En ég á líka eina systur - bestu systur sem nokkur, getur nokkurn tíma hugsað sér. Hún er alltaf til staðar fyrir mig - hún gerir allt fyrir mig og við eigum með okkur samkomulag - sem enginn veit um - nema við tvær.
Hún er kvenna fallegust, með ótrúlegan húmor - réttlætiskennd sem myndi duga heilu þorpi á Vesturlandi og hlátur sem hún sparar ekki. Hún er jákvæð, smekkleg (nema þegar hún er með "óþroskaðan smekk"), góð og ræktar vini sína og fjölskyldu. Hvar ég væri - ef hún væri ekki til staðar - tja.... mig langar ekki einu sinni að hugsa um það.

Bara svo það fari ekki á milli mála - Hjördís systir mín - er besta systir í heimi!!!!

Sorg i Kopavogi....

2006-03-29T15:06:00.000Z

Börnin mín syrgja núna vin sinn, sem fannst látinn í gær. Það er erfitt að vera ekki hjá þeim, halda utan um þau og reyna að hjálpa þeim að skilja - það sem er í raun óskiljanlegt.
Ég fékk e-mail í gærmorgun þar sem stóð að leitað væri að Pétri Ben. - en fyrir ykkur sem ekki vitið þá heitir sonur minn Pétur Benedikt og er kallaður Pétur Ben. Þessi ungi maður hét hins vegar Pétur Benediktsson og var vinur barnanna minna. Ég man vel eftir þessum dreng - ekki síst vegna nafnsins.
Hugur barnanna minna, Hjallanna og okkar allra er hjá fjölskyldu og vinum Péturs Ben. heitins.

Megi góður Guð styrkja þau öll og vaka yfir þeim.

Ferðir til og fra Florida

2006-03-27T16:33:00.000Z

Jæja - nú eru börnin mín/okkar(flest en ekki öll) að koma til okkar 11. apríl. Það er mikil tilhlökkun hjá okkur að hitta þau, klípa aðeins og kyssa til óbóta........ Hin sem ekki koma núna - þau verða fyrir barðinu á okkur í lok apríl, en við ætlum að koma heim í nokkra daga 27. apríl - 8. maí.
Við leitum hér með að húsnæði á þessum tíma - ef þið vitið um einhvern sem vill vera á Florida á sama tíma - eða um einhvern sem vill leigja íbúðina sína á þessum tíma - látið okkur endilega vita.

Ef enginn vill hafa okkur - þá verðum við bara í okkar fallega húsi í Skorradalnum!!

Evidence - Anita Briem....

2006-03-25T19:35:00.000Z

Sáum fyrsta þátt í nýjum bandarískum spennuþætti - þar sem Aníta (dóttir Ernu og Gulla) leikur eitt að stærri hlutverkunum. Gaman að sjá hversu vel henni gengur - og hvað hún er flott leikkona.
Fyllti mig "þjóðarstolti" - þó hún léki með "breskum" hreim..........
Flott stelpa - foreldrar hennar mega svo sannarlega vera stoltir af henni!

Silvia Night - endalaus snilld!!

2006-03-24T19:29:00.000Z

Við vorum að horfa á Silviu Nótt - og hlusta - á ensku útgáfuna. Þvílík endalaus snilld - hún er auðvitað algjört kast og ekki eru dansherrarnir verri. Textinn alveg frábær!
Það verður gaman að fylgjast með þessu - þ.e. ef við sjáum Eurovision í Ameríku - en hver veit??

Ingibjörg hrekkjusvin - aðdaandi nr. 1!!!

2006-03-22T14:56:00.000Z

Ég viðurkenni það - ég get verið svoldið hrekkjusvín - og nú viðurkenni ég hvað ég er vond!
Góð vinkona mín sagði mér frá því að næstum fyrrverandi eiginmaður hennar væri farinn að hóta fólki úti í bæ - fyrir nokkuð sem ég gerði...
Málið er þetta: vinkona mín býr í útlöndum(eins og ég) og heldur úti bloggsíðu - (eins og ég). Hún skrifar þar sínar hugrenningar - (eins og ég) og svo getur maður "kommentað" - (eins og hjá mér). Ég (hrekkjusvínið) er búin að skrifa komment hjá henni sem aðdáandi nr. 1 - henni og vinkonum hennar til mikillar "spennu og forvitni". Mitt heimafólk veit af þessu gríni mínu, hefur fylgst með mér skrifa - og ef grannt er skoðað, þá sést að þetta getur alveg eins verið kona sem er að skrifa þessi komment, þar sem ég hef passað að gefa aldrei í skyn að "þetta" væri karlmaður.

Nú er svo komið að eiginmaðurinn (sem ég tel líka vera vin minn) er alveg að fara á taugum yfir þessum "karlmanni" og er farinn að hóta t.d. einum vini mínum.
Þá verð ég að hætta að hrekkja - og viðurkenna hvað ég get verið mikið hrekkjusvín.

Ég er samt - og verð alltaf aðdáandi hennar nr. 1...................

Myndir og fleira.....

2006-03-17T13:07:00.000Z

Stella frænka er að kenna mér að setja inn myndir - nú ætla ég að prófa....... Og þetta tókst svona líka vel. Þetta er mynd af Hjördísi Perlu - með "Erlu frænku svipinn" að skora!!

Hún hefur víst handboltahæfileikann frá mömmu sinni - eða svo er mér sagt.........

Slattur og trjaklippingar i 25 stiga hita.....

2006-03-12T18:05:00.000Z

....ég mæli ekkert sérstaklega með því!
But "a man´s got to do what a man´s got to do..........
Minn fylgir sláttuvélinni - einhversstaðar á landareigninni - en ég held mig við það að klippa hekkið við "screenið" á sundlauginni - er sem sagt nær glasinu með klakanum og vatninu!

Við fórum í íslendingapartý í Ventura á föstudagskvöldið - þar sem meðalaldurinn var 68 ára. Við vorum kölluð "unga fólkið" og okkur leið frekar vel með það. Hittum fullt af skemmtilegu fólki og allir mjög ánægðir með framtak okkar í bakarýsmálum....... bíða allir eftir normal-brauði og snúð með glassúr!

Jæja - aftur út að klippa tré..........

Reykt fuglahreiður!

2006-03-08T14:09:00.000Z

Það var frekar kallt í gærkvöldi eða ca. 13 gráður (ekki 13 gradir eins og systir mín myndi segja) og kveikti húsbóndinn þess vegna fyrst á hitanum á neðri hæðinni og síðan kveikti hann upp í arninum. Ég bað hann að kíkja (eins og hægt er) upp í strompinn þar sem ég hafði heyrt mjög fagran fuglasöng síðastliðna morgna, söng sem mér finnst eiga upptök sín í strompinum. Minn kíkti, sá ekkert óvanalegt og kveikti þess vegna upp. Við hjónin sátum svo í okkar sófa og horfðum á Idol-iið( ameríska). Við heyrðum auðvitað ekkert frá strompinum, ekki skrítið, við vorum að hlusta á Idol í "surround" og HD tækni... (hvað sem það nú er).......
Núna í morgun - þegar ég var að borða morgunmatinn minn - heyri ég ennþá söng úr strompinum - og þar sem ég hef ekki mjög þróað tóneyra - get ég ekki fyrir nokkurn pening - sagt hvort þetta er gleðisöngur - eða sorgarsöngur.......... Ég finn samt fyrir einhverjum trega í hjarta mínu - en kannski er það bara heimþrá!!!

p.s. Það er skógardúfa á hreiðri í tré fyrir framan húsið - en Grétar fær ekki að kveikja eld nálægt því tré! Ég verð á varðbergi - eins og Smokey the Bear!

Þorrablot, hakarl og brennivin.....

2006-03-05T22:12:00.000Z

Fór á Þorrablót á Melbourne-ströndinni í gærkvöldi. Mikið fjör, Helga Möller, Maggi Kjartans, VIlli Guðjóns, Helena Eyjólfs og Hemmi Gunn sem veislustjóri. Mikið hlegið og mikið borðað, þó aðallega hangikjöt og harðfiskur. Greyið fólkið sem gisti á hótelinu, lyktin af matnum "tók á móti" manni þegar gengið var inn í anddyrið á hótelinu....... Mikið hlegið af því að Konni mágur, vann 2 af happdrættisvinningunum (maðurinn í 4ra daga heimsókn)........ Þannig að nú er ég með flatkökur og reyktan lax í ískápnum, því ekki tekur Konni þetta með sér heim aftur!
Helga Möller og Siggi ætla að koma í mat á miðvikudaginn og þá fæ ég sendingu frá Hjördísi systur minni - vei vei vei.......

Goður gestur!

2006-03-03T22:01:00.000Z

Það var hringt hingað rétt fyrir hádegi (rétt fyrir kll. 17 á íslenskum tíma) og Hákon bróðir Grétars tilkynnti að hann væri á Keflavíkurflugvelli - á leiðinni til okkar í heimsókn.
Þvílík snilld - gaman að fá hann í heimsókn (þó hann kunni ekkert að elda)...........

Vinsamleg tilmæli til ættingja og vina.......

2006-03-02T18:31:00.000Z

Jæja, þið getið farið að undirbúa hátiðarhöldin.

Við ætlum að koma til Íslands 27. apríl og stoppa í 12 daga! Þess vegna ákvað ég að láta ykkur vita með góðum fyrirvara, svo þið gætuð verið tilbúin með skrúðgöngurnar, veislurnar og allt það.........

Ég er svo góð.............

Solböð eða ekki solböð?

2006-02-28T19:42:00.000Z

Ég er búin að hlægja svolítið að Patriciu vinkonu, hún fór með sínum manni niður á strönd, lengst niðureftir Floridaskaganum. Ath. hún er búin að búa hér í mörg ár..... en hún brann svo heiftarlega að það var ekki fyndið - og þó - hún notaði ekki sólarvörn!! Ég sem hélt að ALLIR notuðu sólarvörn, ég t.d. set á mig 45 í vörn - bara ef ég fer út úr húsinu. Kannski er það ég sem er rugluð - en ég brenn ekki á meðan.....

Bráðum ætla ég að fara í "flotta" kjólinn sem frænkurnar gáfu mér og láta taka af mér mynd - svona til að sýna restinni af vinunum, hvernig smekk þessar frænkur hafa!
Ef þessi kjóll sést opinberlega hér á Florida - verð ég líklega rekin úr landi - þannig að þær geta þá haft það á samviskunni!

Er að spá í að setjast aðeins út við laugina - fjölskyldunni minni heima - sem hefur séð mig í gegnum I-sight eða önnur góð forrit - finnst ég föl!

Tækninni fleygir fram.......

2006-02-27T19:28:00.000Z

núna er ég búin að tala við Óla bróður, pabba, Hjördísi systur og Stellu frænku - og horfa á þau í leiðinni.
Ég skil alveg hvernig þetta virkar, en pabbi er ekki alveg að ná þessu. Hann hélt meira að segja að þetta gæti verið "ólöglegt í USA". Hann er svo mikil lumma! En hann er ennþá að tala um þetta: að sjá húsið mitt, bílinn og allt umhverfið í gegnum tölvu.
Já svona er þetta líf - fullt af nýjungum og spennandi hlutum..........

Flott frænka.....

2006-02-23T20:37:00.000Z

ég á margar, flottar frænkur......Þær eru hver annari laglegri, duglegri og skemmtilegri. Skemmtilegasti hópur sem til er - þegar depurð hrjáir einhvern!

Ein þeirra er hér til umræðu. Hún er aðgjörlega í sérflokki þegar kemur að dugnaði. Karlfýlan sem hún bjó með, fékk fiðring í sig og lét sig hverfa, frá henni og börnunum. Greyið hann - þar missti hann af lottóvinningi. Og þar sem hann var ekki greindari en þetta - að vita ekki hvað hann var með í höndunum - þá var gott að losna við hann.
Þessi frænka mín er kvenna fríðust, var að klára tækniháskólann, með 3 börn (og farþegann á öxlunum) en er komin í frábært starf og stendur sig alveg eins og hetja.

Ég er stolt af konum eins og þessari frænku minni - hún getur ALLT sem hún vill - og gerir það vel.

Mér þykir vænt um þig - og farðu verulega vel með þig!!!

Indiana Jones og frumskogurinn......

2006-02-23T14:47:00.000Z

við Jónína vorum að ryðja "skóg" í gær. Það er á hreinu að tré, runnar, pálmatré og þess háttar, vex - bæði hraðar og betur en við íslendingar eigum að venjast. Það hefur enginn búið í húsinu mínu í hálft ár - húsið er í mjög góðu standi - en garðurinn hefur gleymst. Við vorum að "grisja" ef það er rétta orðið - mætti frekar tala um að "ryðja". Við erum búnar með c.a. 1/10 af garðinum, þannig að það er nóg eftir.
Ég ætla að fara á eftir og finna mér sveðju - og hatt!!

Sjáumst!

Stella frænka "klukkaði" mig - og þannig er nu það....

2006-02-20T21:59:00.001Z

Ég mun gera mitt besta til að svara þessu......

4 störf sem ég hef starfað um ævina.
Flugleiðir
Cityvarvet - Gautaborg
Stöð 2 (sem var og hét)
Síminn

4 myndir sem ég get horft á aftur og aftur.
As good as it gets
Forest Gump
Shinging
Godfather

4 staðir sem ég hef búið á.
200 Kópavogur
Gautaborg
108 Reykjavík
200/203 Kópavogur

4 staðir sem ég hef farið til í frí.
Flórída
Spánn
Skorradalur
England

4 heimasíður sem ég heimsæki daglega.
mbl.is
jahernamig.blogsport.com
blog.central.is/octopussys/
kbbanki.is

4 uppáhaldsmatartegundir.
Kalkúnn
Kjúklingur
Ís
Hreindýr

4 staðir sem ég vildi heldur vera á.
Ofan í sundlauginni
Skorradalur í heita pottinum
Með börnunum mínum - einhversstaðar
Allir góðir staðir

4 hlutir sem ég hlakka til.
Að opna bakaríið
Að hitta börnin mín/okkar
Að eignast Corvettu
Að verða "stór"

4 bloggarar sem ég ætla að klukka.
"Einar Áskell"
Júlli
Hulda Proppé
Ástkær eiginmaður minn

Girls night out.......

2006-02-18T14:48:00.000Z

við fórum í gærkvöldi, nokkrar saman nágrannakonurnar, bæði íslenskar og amerískar, downtown Disney. Skemmtilegt svæði sem ég hafði ekki komið á áður. Þarna eru allskonar klúbbar, lifandi tónlist, góðir veitingastaðir og "stand-up" staðir. Þetta var ekkert smá gaman - mikið hlegið - og þær amerísku fengu sinn skammt af íslenskum húmor og lærðu að skemmta sér "the icelandic way"!
Þarna kom upp bráðsmiitandi "tourette" tilfelli - og merkilegt var að það skildi smitast á íslensku!! Mikið hlegið og okkur fannst við mjög skemmtilegar.

Í dag skín sólin og skellihlær - og ég ætla að draga minn heittelskaða - fallega - eiginmann út í garð að klippa tré...... Hann er svona rétt að jafna sig á stærðinni á garðinum, hann komst að því um daginn (þegar hann var að leita að "sprinkler-systeminu" hvað landareignin er stór. Það þarf að klippa niður "nettan" frumskóg - fyrir framan sundlaugar-svæðið! Þarna eru litlar eðlur (sem mér finnst sætar) og stórar engisprettur (sem eru hálfsystur leðurblaka) og mér finnst þær EKKI sætar. Mér er ekki illa við skordýr - but this is to much!!!

Gott að hafa riddarann á hvíta hestinum (með bláu handskana) með sinni!!!!

Hitastigið að hækka!

2006-02-14T18:45:00.000Z

Jæja - þá er þetta kuldakast að verða búið. Allavega á að vera ca. 25° á fimmtudag og föstudag.

Núna er "sundlaugarkallinn" að gera sundlaugina klára fyrir sumarið - og það virðist taka aðeins lengri tíma að fylla laugina - en það tekur að láta renna í baðið. Svo ætla ég að kaupa svona "huge" sigti til að veiða laufblöðin upp úr lauginni.
Talaði við Gunna bróður og Ernu mágkonu áðan - og ég vona að þau taki sig nú til og fari að panta flug til Orlando.
Sama á að vísu við um Hjördísi systur mín og Óla bróður minn - ég vil fá ykkur í heimsókn við fyrsta tækifæri.

Jæja - nú er bara að fara upp og finna bikini-ið og skella sér í laugina!

Frost er uti - fuglinn minn!

2006-02-13T14:02:00.000Z

Já kæru vinir - nú er frost á Florida. Miðað við staðsetningu mína núna er frekar kallt. Floridabúar tala um að það verði sett nýtt kuldamet í dag og á morgun. Maður spyr sig hvort þetta hafi komið með ferðatöskunum okkar!!

En vorið er á næsta leiti hér - sólin skín þó glatt og hitar lúin bein.

Annars er allt í fullum gangi hjá okkur - velja gólfefni á bakaríið og ræða við arkitekta og annað gáfulegt fólk.

Ég er komin með nettengingu og heimasíma - nokkuð sem svona veraldarvant fólk eins og við - þurfum nauðsynlega að hafa til að vera í sambandi.

Þetta veika folk sem vinnur a DV!!!

2006-02-09T12:51:00.000Z

Jæja - þá eru ritstjórarnir á DV endanlega búnir að syngja sitt síðasta - svona þegar það kemur að mér. Við fengum símtal í morgun þar sem okkur var sagt að Viðar mágur væri núna á forsíðunni. Við fengum líka að heyra það rétta í málinu - að hann hafi verið handtekinn og sleppt strax aftur - þar sem um mistök var að ræða. Lögreglan bað hann afsökunar - þeir höfðu farið mannavillt. En viti menn - DV hefur þarna framið enn eitt MANNORÐSMORÐIÐ!!!! Fjölskyldan og sérstaklega fullorðnir foreldrar Viðars, sitja eftir í sárum og hafa fengið sáluhjálp frá presti.
Ég er svo reið og mér líður svo illa með þetta - en ég trúi samt einu - þeir sem kasta drullu í náungann - þeir hafa nóg af drullunni sjálfir - annars væru þeir varla að kasta henni í aðra!

Við fengum líka þær fréttir að núna yrði farið í mál við DV - og ekki vanþörf á.
Ég hef unnið hjá þessu fyrirtæki sem nú rekur 365 miðla - ég hef séð þessa menn sem núna sitja við stjórnvölinn þarna hjá DV - ég hef horft á þá gera hluti sem þeir myndu EKKI vilja að væru á forsíðu DV - svona t.d. í fyrramálið - þegar þeir vakna!

Er ekki komið að því að fólk hætti að styrkja aumingja í aumingjaleik!!!!

Lifið i hraða og "slowmotion"

2006-02-07T14:07:00.000Z

Jæja - nú erum við farin að slást við "bírókratíuna" í Ameríku. Okkur finnst hlutirnir ganga hægt fyrir sig heima þ.e. hjá sýslumanni og þannig - en halló - þið ættuð að vera hér. Við erum helst í því að naga handarbökin á okkur og bíða róleg. Það er allt á fullu hjá okkur - í því að hitta arkitekta, verktaka ofl.

Svo er verið að koma "húsgögnunum" í húsið. Húsið er bara svo stórt......... Við eigum þó hérna rúm, sjónvarp og svo erum við með borð sem Jónína vinkona var búin að kaupa. Svo koma kassar frá Íslandi - líklega í vikunni og þá fáum við mikið af dótinu okkar........ vei vei vei!

Sólin skín - en svolítið kallt núna (ekki nema ca. 20) sem er lítið miðað við árstíma!

Meira seinna!

Komin til Florida!

2006-01-31T16:24:00.000Z

Jæja elskurnar - þá er ég komin til Florida. Ekkert sérstaklega heitt - 15° - en sólskin eins og lög gera ráð fyrir. Ég viðurkenni að það var erfitt að kveðja fólkið mitt, sérstaklega pabba (veit auðvitað ekki hvort ég sé hann aftur) og börnin mín sem ég elska út af lífinu , Óla bróðir minn, Gunna bróðir- Hjördísi systur (bestu systur sem nokkur getur átt) og alla og alla!! Frænkurnar gáfu mér gjöf sem angaði af Þorramat, ég varð (nauðsynlega) að þvo dressið - en ég SKAL fara í dressið seinna og bið Grétar að taka af mér mynd og sendi vel völdum vinum mínum!!!

En - heimurinn er lítill og það tekur jafn langan tíma að fljúga til Orlando og að keyra til Egilsstaða (þið megið velja hvert þið farið). Ég fæ húsið mitt afhent í dag og er á leiðinni út að kaupa mér rúm.
Hlakka til að sofa í mínu húsi í nótt. Við Grétar og Jónína erum að fara að ná okkur í bílaleigubíl - svona til að brúa bilið þar til Grétar fær Navigatorinn sinn...........

Svo bíður rauða Corvettan einhverstaðar eftir mér og kallar nafnið mitt! Ingibjörg... ingibjörg.... ingi.....

Frænkurnar kveðjast........

2006-01-27T21:01:00.000Z

Jæja - nú hafa frænkurnar ákveðið að kveðja Fallegu-Florida-Frænkuna - formlega. (Hvað eru mörg F í því???)

Samkvæmt öllu hefði ég átt að fara út í dag - en svo tók "einhver" upp á því að eiga afmæli á morgun - laugardag - og þessi "einhver" hefur dálæti á Stjórninni og mun hún þ.e. Stjórnin spila í afmælinu og þess vegna er ákveðið að ég muni fara af landi brott á mánudaginn 30. janúar.

Við ætlum sem sagt að hittast á Solon kl. 16 á sunnudaginn - og býð ég hér með aðrar "frænkur" velkomnar. "Frænkur" myndu skilgreinast sem tengdar mér - blóðtengdar eða vina-tengdar.

Hlakka til að sjá allar "frænkur" mínar!

Þingholl kvaddur i bili........

2006-01-21T13:41:00.000Z

Jæja - þá er verið að ganga frá öllu, búið að ryksuga og skúra, kveðja alla innanstokksmuni og kyssa Fuffu á trýnið (svona allavega í huganum). Það hefur ekkert versnað útsýnið hérna, þó að við séum að fara (allavega næstu 3 mánuði)........ Og ég er næstum viss um að þetta verður allt hérna - þegar ég kem næst. Viðurkenni þó fúslega að það er smá söknuður í mér.

Næstu dagar fara í það að ganga frá í töskur, kveðja fólkið mitt (okkar) og fara svo á vit ævintýranna í vesturheimi.

Svona miðað við það þegar ég var við nám og störf í Gautaborg á sínum tíma, þá er svona ferðalag ekkert mál. Nú get ég hringt gegnum netið, bloggað, lesið moggann á netinu og ég veit ekki hvað og hvað...... Það er smá breyting frá því að fá Moggann upprúllaðan í pósti, svona á mánaðar fresti - frá mömmu. (Nú segir Gudda að ég sé gömul......)

Þar til næst....... over and out!

Komin i sveitina - vei vei vei......

2006-01-19T18:11:00.000Z

Nú erum við hjónin komin aftur í Skorradalinn, búið að kveikja upp í kamínunni og hækka í pottinum. Snjór yfir öllu og skrítið að sjá hvernig trén liggja niðri - undir snjónum.
Ég fann gamalt brauð og fór með það - langt frá bústaðnum - til að gefa Fuffu (sem er lítil hagamús). Grétar vill ekki að ég gefi henni fyrir utan bústaðinn - ég sem vil hafa hana hérna inni til að hún geti hlýjað sér. Svona er fólk ólíkt!

Nú er bara að njóta þess að vera hér í hlýjunni og slaka aðeins á.........

Skorradalur - online......

2006-01-08T14:33:00.000Z

Jæja - þá er loksins komið að því, það er komin Internettenging á Þinghól. Nú get ég "bloggað" úr sveitinni. JAX er sem sagt búinn að tapa keppninni - þar sem hann er EKKI með Stöð 2!!!!!

Við erum búin að hafa það gott í rokinu og snjónum og rigningunni. Ég vaknaði að vísu í nótt við eitthvað furðulegt "væl" í húsinu en ég held að það hafi átt sér skýringu í veðri og vindáttinni. Þannig að ég snéri mér bara á hina hliðina og hélt áfram að nýta fegurðarblundinn. Og þar sem ég svaf næstum 11 klst. þá hlýt ég (samkvæmt öllu) að vera orðin mjög lagleg. Var að vísu búin að tapa mikilli fegurð vegna svefnleysis síðustu vikur - þannig að ég er líklega bara á núll-punkti. En þá er víst best að leggja sig.........
Núna erum við hjónin að fara yfir pappíra - sem við höfum sankað að okkur síðustu mánuði, flokka og senda sumt í ruslið....... Reyni þó að setja ekki reikningana í ruslið, þó það sé freistandi.

Over and out - í bili.......

Er hægt að kaupa meira af mat?

2005-12-29T20:00:00.000Z

Nú er hafinn undirbúningur að veislunni miklu sem verður hér hjá okkur utanlandsförunum á Gamlárskvöld. Keyptir hafa verið 2 kalkúnar (eða kalkhænur - er ekki viss) og þeir hafa verið lagðir í kæli til afþíðingar. Síðan verða þeir teknir á laugardagsmorguninn og góðgæti troðið í afturendann á þeim. Gott þeir eru dauðir!
Við verðum hér "stórfjölskyldan" alls 14 manns og verður mikið um mat og skemmtilegheit. Börnin hafa óskað eftir miklu magni af "dessert" þannig að ég sé fram á að búa til a.m.k. tvöfaldan skammt.
Hluti barnanna gaf okkur Kvikmyndaspilið í jólagjöf - svona til að þurfa ekki að drekka ógeðsdrykk - eins og í fyrra - þegar 70 mín. spilið var spilað.
Mér þykir gaman að elda "góðan" mat - og hlakka þess vegna mikið til að elda á laugardaginn!!

Milli-jola-og-nyarstiminn........

2005-12-28T12:10:00.000Z

gengur á með éljum..... eins og það sé eitthvað nýtt!
Nú erum við hjónin búin að taka til í bílskúrnum, þannig að nú verður hægt að byrja að setja kassana saman til að pakka ofan í þá. Það er ótrúlegt hvað er hægt að henda miklu, sérstaklega þegar við erum nýbúin að fara yfir bílskúrinn og henda a..m.k. 3 kerrum af drasli!!
Ég er oft búin að segja - við flytjum með okkur kompur - pælið í því - maður pakkar drasli í kassa - setur í kompuna eða bílskúrinn, opnar kassana aldrei - og flytur þá með sér milli heimila...... er eitthvað rugl í gangi?

En það gengur vel að pakka - flest fer í kassa og í geymslu - en sumt fær að fara í sólina á Florida...... heppni!

Aðfangadagur........

2005-12-24T14:45:00.000Z

ég á vin sem er veikur - andlega og núna líka líkamlega. Ég veit ekki hvar hann verður í kvöld - en ég vona að hann nái sátt og ró í hjarta sitt og að jólin komi til hans, með gleði og ljós!
Ég er búin að hugsa mikið til hans - og um hann síðustu daga og ég finn svo mikið til með honum.

Mér þykir alveg rosalega vænt um þennan vin minn, hann er skemmtilegur, góður og lífsglaður - þ.e. þegar hann er ekki veikur.
En hann er sem sagt veikur - og það sem er verst við þann sjúkdóm sem hrjáir hann - hann vill ekki fá aðstoð. Hann vill ekki fá aðstoð við lækninguna og hann vill ekki takast á við sársaukann sem fylgir því að viðurkenna vanmátt sinn.
Það er enginn sem segir að lækningin sé auðveld, en eins og ég hef svo oft sagt: Það er betra að láta sér líða mjög illa í stuttan tíma, en að líða illa í langan tíma.
Ég vona að Guð gefi honum styrk, æðruleysi og dómgreind til að takast á við lífið - sem getur verið svo gott og fallegt - ef maður er tilbúin til að viðurkenna vanmátt sinn og njóta hvers dags fyrir sig.

Gleðileg jól - allir vinir mínir - allsstaðar!

Manudagur - rigning og slappleiki.....

2005-12-19T15:16:00.000Z

Ég tók upp á því í morgun að vera slöpp. Það hlaut að vera, ég sofnaði í gær í flíspeysu og sokkum, mér var svo kallt. En ég er búin að ákveða að klára þetta á mjööög skömmum tíma, þar sem ég má ekki vera að því að vera veik núna.
Svo er þetta líka frekar leiðinlegt!

En svo er það hitt: Það er ástæða fyrir því að maður veikist, ónæmiskerfið fer "í ræktina" og þá verður maður að gefa eftir. Í raun á ég að þakka fyrir að veikjast, það á sér nefnilega stað alveg einstök endurnýjun.
Ný og betri ég - er hægt að biðja um meira??

Ég bara spyr........

Þegar piparkökur bakast...... lalalala

2005-12-15T10:57:00.000Z

Jæja - nú er loksins komið að því. Ég er að fara að vinna í bakaríinu - til að læra að vinna í bakaríi! Það þýðir víst lítið að mæta algjörlega reynslulaus til USA og ætla að fara að reka bakarí.
Nei - nú set ég á mig svuntuna og ætla að vera hjá Reyni bakara, alla vega eftir hádegi í dag. Svo er það auðvitað spurning hvort ég fái áframhaldandi ráðningu ;)
Vinkonur mínar í Drekaklúbbnum - sem og aðrar vinkonur og frænkur - segjast ætla að fjölmenna í bakaríið í dag, þær halda líklega að þær fái afslátt - but no!!
Ef þið komið og verslið - og þekkið mig ekki - þá er ég þessi í rauðu strigaskónum í anda jólanna...........

Bankamenn, lögfræðingar, ahættumatsserfræðingar.....

2005-12-13T19:57:00.000Z

Það er búið að vera mikið í gangi síðastliðna daga. Endalausir samningar, upplýsingaöflun, upplýsingagjöf, teikningar, innréttingar, pantanir, samtöl, símtöl........ og svo...... gengur allt saman!!!

Magasýrurnar eru að ná eðlilegu jafnvægi, stress-stuðullinn fer lækkandi og bráðum get ég sest niður og hlegið að öllu stressinu. Ég hlakka til - og þá er ég ekki bara að tala um jólin!

Á borðinu hjá mér þessa stundina er eftirfarandi:

Teikningar af bakaríinu (frá Þýskalandi)
Útreikningar vegna fjármögnunar
DVD diskur með logoinu
Verkefnalisti (fyrir næstu daga)
Greiddir reikningar (og ógreiddir)
Fjarstýring (veit ekki af hverju)
Seðlaveskið mitt (aldrei þessu vant í plús)
Head-phones (til að tala á Skype-inu)
.... og síðast en ekki síst:
Smákökuskál (sem var full af smákökum frá Hjördísi Perlu - en er núna tóm) og það var ekki ég sem borðaði þær.....

Mer þykir svo vænt um.........

2005-12-13T15:29:00.000Z

Guðný Helgu vinkonu mína. Henni datt nefnilega það snjallræði í hug (þ.e. eftir að ég benti henni á það) að setja vinkonu sína inn sem link á bloggið sitt. En hún er svo mikil vinkona að hún vissi ekki einu sinni að MÍN var búin að blogga í rúmlega eitt ár og svo "fattaði" HENNAR allt í einu "upp á" hvað þetta var sniðugt - en vissi ekki af vinkonu sinni "the bloggmaster".

En hvað með það - mér þykir samt vænt um hana og hún er líka verðlaunuð fyrir fegurð!!

En ekki spyrja hana af hverju ég heiti Ingibjörg "dúfukúkafýla" - það gleður hennar litla músarhjarta þegar einhver lendir í vandræðum og hún getur endalaust sagt sögur af öðrum - og hlær oftast svo mikið sjálf að hún nær ekki að segja sögurnar.....

Henni finnst hún fyndin!!!

Að pakka - og ekki pakka..........

2005-11-05T15:07:00.000Z

Núna tekur við - mikið pakk!

Ég er búin að setja niður í heila 2 kassa - sem eiga að verða eftir hér heima. Hinu verður pakkað milli jóla og nýárs. Það er erfitt að byrja að setja niður - svona rétt fyrir jólin. Ég þarf að nota ýmislegt fyrir jólaboð og allt það en er búin að ákveða hvað fer og hvað verður hérna niðri í bílskúr.
Ætla að selja sófasettið - samt er húsið úti svo stórt að ég verð í marga mánuði að reyna að fylla það. Settist niður í gærkvöldi til að gera mér grein fyrir útliti og stærð - og hætti bara fljótlega - þetta er svoooo stórt hús!
Sé fyrir mér king-size hjónarúm - og svo 2 stólar í sjónvarpsherberginu - er það ekki bara ágætt??
Svo verð ég eins og "pokakerling" í næstu viku á leiðinni til Florida, ætla nefnilega að fara með eins mikið af "sumarfötum" og ég get - og skilja þau eftir. Býst varla við því að þurfa að nota þau hér heima í nóvember og desember..........

Mannlegt eðli.......

2005-11-01T18:09:00.000Z

Stundum er gott að gefa sér tíma til að rannsaka mannlegt eðli. Ég hef síðustu daga - og aðallega í gær - séð hluti sem ég hélt að væru ekki til.
Þannig er að ég var að fylgjast með fólki - sem kann ekki neitt í svokallaðri sjálfshjálp - missa sjálfsvirðinguna - á mjög áberandi hátt. Ég var, ásamt systur og mágkonum, heima hjá pabba að fylgjast með ættingjum fyrrverandi konu pabba, sækja dót (sem pabbi hafði auðvitað borgað) sem "tilheyrði" móður þeirra. Þarna kom þetta fólk - eins og hrægammar til að sækja dótið og barðist við að missa ekki af neinu. Sem betur fer, var lögfræðingur þeirra á svæðinu, til að fylgjast með að ekkert yrði tekið sem ekki tilheyrði þeim. Stoppa varð einn sem gekk um og þvældist á staði sem hann hafði ekkert að gera á. T.d. var viðkomandi kominn inn á skrifstofuna hans pabba, en var auðvitað vísað út - kurteisislega.
Það sem "toppaði" allt fyrir mér - var það að þau skildu taka rúmið hans pabba (sem hann hafði auðvitað borgað - eins og allt annað). Þeim tókst auðvitað ekki að taka þetta ferlíki í sundur - án þess að brjóta það - sem var lýsandi dæmi. Það brotnaði fleira í flutningnum. Því eins og sagt er: Illur fengur - illa forgengur..............
Ég frétti síðan - frá húsvarðarfrúnni - að þetta sjálfsvirðingarlausa fólk - ætlaði ekkert að nota rúmið, þau ætluðu alltaf að gefa það í Góða hirðinn. Var það nauðsynlegt að brjóta upp venjur hjá gömlum manni með heilarýrnun......... ég bara spyr?

Eins og ég benti lögfræðingnum á - þá tekur ekki einu sinni "skattmann" rúm af fólki - og myndi maður kalla skattinn, hrægamm....... blygðunarlaust!

Gott að vera laus við þetta pakk - og nú er ég kurteis.............

Alltaf jafn hissa..........

2005-10-28T13:58:00.000Z

Ég var að velta fyrir mér hvað ég verð alltaf jafn hissa á því að það skuli koma vetur á Íslandi. Er þetta ekki ótrúleg óskhyggja í manni? Við Prins fórum í göngutúr áðan - hann hoppandi í litlum snjósköflum, með snjó ofan á nefinu og ég svona líka hissa!
En svona er þetta á Íslandi - fyrst er kallt og svo verður aðeins kaldara. Svo koma biðraðirnar á dekkjaverkstæðunum og allir jafn hissa á því líka........
En - bráðum kemur betri tíð - alla vega hjá mér. Það snjóar mjög, mjög sjaldan á Florida og það verður víst ekki á áhyggjulistanum hjá mér á næstunni. Fólk er samt að spyrja mig hvort ég sé ekki hrædd við fellibyli - ég spyr - eru þeir ekkert hræddir við mig?
Þar sem ég kem til með að búa, er lítið um fellibyli - það er helst að það komi smá rok - ekkert sem sannur íslendingur lætur trufla sig með.

Nú er bara vika í að fréttir komi frá fjarlægum löndum - og við Guð erum í góðu talsambandi þessa dagana.......

Guð er góður!

Nu er allt að gerast!

2005-10-25T17:57:00.000Z

Búin að leigja íbúðina út.......
Þá er víst ekki aftur snúið - mun afhenda hana í byrjun janúar. Og þá er bara að kveðja frostið og fymbulkuldann og skella sér í sumarið (allt árið) og sólina.
Allir hlutir eru að ganga upp - eigum bara eftir að fá svör frá einum aðila.
Komin með 2 aðila sem vilja versla við okkur - og við sem erum ekki einu sinni búin að opna.

Fer að lakka táneglurnar - til að vera flott í sandölum (og ermalausum bol)

Mikið að gera í sjoppunni!

2005-09-20T19:36:00.000Z

Komið að því að tjá sig aðeins. Mikið að gera - gaman- en mikið að gera. Núna er málið að vakna snemma, vera til í daginn og halda sig við efnið. Svo er líka gott að taka smá pásu - byggja loftkastala, breyta þeim aðeins, innrétta aftur og svo framvegis. Prins heldur mér við efnið - við förum út að ganga, þefum aðeins af gróðrinum, hann í götuhæð, ég að trjánum. Elliðavatnið er fallegt á haustdögum, Bláfjöllinn vöknuðu í morgun í hvítri kápu (það er ég viss um að þau urðu hissa) og einstaka geitungur er að leita sér að heitara húsnæði. Ég er ekki tilbúin að leyfa þeim að búa hjá mér - en sem sannur dýravinur, veiði ég þá í glas og sendi þá út aftur og bendi þeim á að athuga hjá fólkinu í næsta húsi. Ég er búin að vera að semja texta fyrir mann og annan - og hef þess vegna sést á síðkvöldum í göngutúrum, með I-podinn, headsettið í eyrunum og má teljast heppin að hafa ekki lent fyrir bíl. Hvernig er það eiginlega - sér fólk ekki að ég heyri ekkert nema lögin sem ég er að semja texta við!!! Halló - ég er að gera mitt besta.

Seinna meir.............

Florida í næstu viku............

2005-08-24T12:09:00.000Z

Núna þegar ég ætti að vera að leita að vinnu - ok fer bráðum að vinna í því - þá er ég og minn á leiðinni til Orlando að hitta Patriciu og Hlyn. Hlakka til að hitta þau og velta fyrir mér (okkur) smá business. Hver veit - kannski flyt ég til Florida og verð orðin skemmtilega fjólubláhærð eftir nokkra mánuði. Ekki líklegt...........
Var að velta fyrir mér hvað sumarið er búið að vera þæginlegt. Mikið er gott að vera ekki að vinna í nokkra mánuði. Ætli ég nenni nokkuð að fara að vinna aftur. Verð bara heimavinnandi húsmóðir - eða ekki.
Búin að taka upp verslunarmáta Petreu og er að ná meistaragráðu í Ebay.com. Þetta er auðvitað snilldar verslunarmáti - sérstaklega fyrir konur eins og mig, sem finnst ekki gaman að vera í búðum!

Nýja vöfflujárnið.......ofl.ofl.ofl.....

2005-07-18T16:31:00.000Z

Auðvitað er JAX lööööngu búinn að koma með nýja vöfflujárnið - það er búið að prufukeyra og er járnið auðvitað til háborinnar fyrirmyndar. Þetta er algjör "rolls" þ.e. ótrúlega flott - eins og JAX er von og vísa.
Og svo er heiti potturinn kominn upp á sólpall - algjör snilld. Þetta er svona "plug and play" - búið að tengja við rafmagn - fylla af vatni - og búið að prófa gripinn. Það er svona "bjánaglott" sem kemur á mann þegar maður situr í pottinum á pallinum, og horfir út á Skorradalsvatn. Það er svona "moment" þegar maður gerir sér grein fyrir því hvað lifið er gott.
Annars er stefnan tekin á Skorradalinn á morgun - fram á föstudag - þá á Höfn í Hornafirði til að vera viðstödd ættarmót móðurfjölskyldu Grétars. Svo er bara að pakka aftur saman og fara í Skorradalinn.................. svo er Verslunarmannahelgin og svo er afmælið...................

Vöfflujárn...........

2005-06-20T21:40:00.000Z

Haldið þið ekki að gamla vöfflujárnið hafi endanlega gefið upp öndina á sunnudaginn var. Það var úrskurðað látið - á staðnum - en jarðarförin verður auglýst síðar.
JAX aumkaði sig yfir "bakarameistarann" (sem hafði farið með "Æðruleysisbænina" eins og keðjusöng í ca. hálftíma) og ætlar að kaupa nýtt vöfflujárn fyrir mína! Vei vei vei..........
Ég veit þó - þó JAX sé góðmennskan uppmáluð - og hinn besti vinur - þá liggja einhverjar eiginhagsmunalegar ástæður að baki gjöfinni. Hann mun alltaf vera velkomin í vöfflur á Þinghól.............

Það er gott að vera í fríi........

2005-05-23T17:33:00.000Z

Svona þegar ég var búin að átta mig á því að ég væri ekki að fara að vinna strax - þá komst ég að því hvað það er gott að vera í fríi. Ég hef tíma til að vera með pabba - vei vei vei - og hef tíma fyrir sjálfa mig líka. Göngutúrar - sumarbústaðurinn - heimsóknir - lestur "góðra bóka" og allt það.
Ég ætla að njóta þess - í botn - og fara svo að vinna aftur - þegar ég er orðin stór.

Skoðun 2005

2005-04-18T20:53:00.000Z

Gleymdi að segja ykkur að ég er komin með "Skoðun 2005"
Heppin týpa........

Veislan voðalega undirbúin..........

2005-04-18T20:49:00.000Z

Á föstudagskvöldið veriður "veislan voðalega" haldin í Skorradalnum. Búist er við allt að 15 manns og verður mikið um mat. Þarna verða samankomnir helstu "gourmet-aðilar" bæjarins. Ég get því miður ekki gefið upp matseðilinn strax - hann á að koma á óvart.
Guðný er búin að taka til "Actionary-spilið" og ég held að Belgurinn sé byrjaður að æfa. Kannski verðum við heppin með veður og þá verður leikurinn fluttur út á sólpallinn. Ef ekki þá er nóg pláss inni.
Pant vinna..............

Gott að vera í fríi........

2005-04-18T20:45:00.000Z

Ég var að velta fyrir mér hvað ég er heppin að vera í fríi. Vorið er alveg að springa út og vorlyktin er komin í loftið. Við Prins fórum í göngutúr í dag, ég að skoða trén og að fylgjast með hvernig þau eru að springa út - en Prins að pissa á þau.
Misjafnt hvað við fáum út úr göngutúrum!!

Svona getur þetta verið.......

2005-04-14T09:16:00.000Z

Pétur fékk skotveiðileyfið um daginn, fór með félaga sínum til að skjóta "löglega". Þeir skutu nokkra máva - og eina litla lóu (óvart, vonandi) sem hafði barist á móti veðri og vindum til að komast til Íslands - til að finna sér kærasta. Tilviljunin réði því svo að hún flaug fyrir framan nefið á Pétri og vini hans.
Hugsið ykkur hvað lífið er skrítið - ekki bara hjá mannfólkinu, líka hjá lóunni.
Lóan er komin - dáin og étin.

Skammdegisskór - og svo aðrir skór

2005-04-13T15:53:00.000Z

Var að velta fyrir mér hvort "skammdegisskórnir" mínir viti af því að það fer að koma að kompuferð - fyrir þá. Bráðum er orðið of bjart til þess að þeir geti verið ofan jarðar.
Þeir þola nefnilega ekki dagsbirtu - krumpast allir og kveljast!
Gott á þá - hverjum er ekki sama.
Það er að koma vor og þá fer ég í "hina" skóna.
Vei vei vei!!

Snilld!

2005-04-13T15:49:00.000Z

Önd kemur inn á bar og spyr barþjóninn: "Áttu brauð"?
Barþjónn: "Nei".
Önd: "Áttu brauð"?
Barþjónn: "Nei".
Önd: "Áttu brauð"?
Barþjónn: "Nei við erum ekki með neitt brauð".
Önd: "Áttu brauð"?
Barþjónn: "Nei, við erum ekki með neitt fjandans brauð hér"!
Önd: "Áttu brauð"?
Barþjónn: "NEI! Eru heyrnarlaus eða hvað!? Við erum ekki með neitt
djö****** brauð hér! Ef þú spyrð mig einu sinni enn þá negli ég helv***
gogginn á þér fastan við barborðið, óþolandi fáviti"!!
Önd: "Áttu nagla"?
Barþjónn: "Nei".
Önd: "Áttu brauð"?

Gúmmíteygjur - til hvers?

2005-04-13T15:38:00.000Z

Hvað gerir maður við 400 gúmmíteygjur? Ef þú ferð út í búð og það eina sem þér dettur í hug að kaupa eru 400 gúmmíteygjur - er þá ekki eitthvað að? Ég velti þessu fyrir mér í smá stund og komst svo að þeirri skemmtilegu niðurstöðu að það er allt í lagi að kaupa 400 gúmmíteygjur.........

Hið besta mál!

Æðruleysi

2005-03-31T15:03:00.000Z

Góður vinur minn og bróðir var að tjá sig um umburðarlyndi í gærkvöldi. Það var - eins og venjulega - rosalega gott að hlusta á hann. Hann var að tala um hvað það væri gott ef maður næði því að sýna öllu og öllum umburðarlyndi. Það reyndi auðvitað á mitt umburðarlyndi af því að hann var um leið að segja mér frá ferðalagi sem hann er að fara í: Galapagos-eyjar - ekki leiðinlegt það! Ég ætla að fara í svoleiðis ferðalag - þegar ég er orðin stór.
En svona í framhaldi af því - þá fór ég að velta fyrir mér ÆÐRULEYSI. Það orð er svona - Eitt í öllu orð - þar sem umburðarlyndi, samhugur, góðmennska, yfirvegun og öll þess góðu orð - koma saman í eitt orð.
Flott orð - ég ætti kannski að láta tattóera það á ennið á mér!

Forgagnsröðun

2005-03-31T14:59:00.000Z

Auðvitað er ég að búa mér til afsökun fyrir blogg-leti. Reyna að selja mér og öðrum það að ég hafi verið að forgangsraða. Bull og vitleysa - ég hef bara gleymt að tjá mig - og á stundum ekki nennt því.
Og algjörlega án þess að ég þurfi að afsaka mig - þá er ég samt að hugsa um að bæta úr þessu. Það hefur nefnilega svo margt skemmtilegt gerst á síðustu mánuðum. Hlutir sem þroska mig og bæta sem manneskju............

Að "fríka út" í desember.........

2004-12-16T11:06:00.000Z

Hafið þið tekið eftir hvernig ljúfasta, geðbesta og greindasta fólk, getur gjörsamlega misst stjórn á sér í desembermánuðum. Þetta er skemmtilega "stúdía" - mjög skemmtileg. Alla vega fyrir þau okkar sem lendum ekki í þessu stjórnleysi. En fyrir "stjórnleysingjana" er þetta alveg örugglega alls ekkert skemmtilegt.
Ég á systur (bestu systur sem nokkur getur óskað sér) og þessi elska er svo "sýkt" af svokölluðu jólastressi að það hálfa væri nóg. Hún veit af þessu og gerir allt sem hún getur til að halda "sjúkdómseinkennum" í lágmarki. En hún má t.d. ekki: hlusta á útvarp (Bylgjan, Létt, Mix) og þannig stöðvar - sem öskra á hana að hún megi alls ekki "GLEYMA AÐ KAUPA JÓLAHANGIKJÖTIÐ"
Við getum hlegið að þessu - svona inn á milli - og erum búnar að komast að þeirri niðurstöðu að best er að kaupa, sjóða og borða helv..... hangikjötið í september.................. og þar hafið þið það!

Elsku ........., þú mátt eiga frí í dag, þinn Guð!

2004-12-16T10:10:00.000Z

Þetta er eitthvað það besta sem ég hef heyrt í langan tíma. Góð kona sagði mér að hún væri með þetta skrifað á miða í veskinu sínu. Ég gerði slíkt hið sama - og þvílík gæfa. Nú þarf ég ekki að hafa áhyggjur af öllu. Raunir heimsins eru ekki á mínum herðum og ég er ekki ábyrg fyrir lífi annara. Þar sem Guð er almáttugur - þá lofa ég að reyna ekki að taka af honum vinnuna hans. Hann er fullfær um að sjá um okkur - lömbin hans!

Go God!!!!

Átt þú vini?

2004-12-03T14:24:00.000Z

Það er svolítið skrítið að velta því fyrir sér - hvort maður eigi vini. Alla vega hef ég verið að því síðastliðna daga og hef auðvitað komist að ótrúlega "greindarlegri" niðurstöðu. Ég hef komist að því að alvöru vinir eru bara þeir sem eru vinir í gegnum þykkt og þunnt. Hitt eru kunningjar og eru samt sem áður ómissandi sem slíkir. En ef maður gengur í gegnum erfiðleika - þá eru það VINIRNIR sem eru til staðar - kunningjarnir eru uppteknir. Það er eins og þeir vilji ekki taka þátt í erfiðleikunum - bara gleðinni - kannski er bara svona mikið að gera - og ekki ætla ég að dæma þá sem verri manneskjur en þeir eru bara ekki vinir..... Gott að vita..........

Það er kallt í Svíþjóð

2004-12-02T13:07:00.000Z

Aldrei aftur skal ég kvarta yfir veðrinu á Íslandi. Hafið þið verið í 16° C frosti, raka og roki. Mæli ekki með því. Það frýs í nefinu á manni þegar maður kemur út á morgnanna.
En samt var frábært - ég keypti mér bara "skammdegisskó" en það eru skór sem þola EKKI dagsbirtu! Svona skóm er "lagt" á vorin........ Svo klæddi ég mig vel - við erum bara að tala um að labba á milli húsa - það er ekki eins og ég hafi verið í fjallgöngum.
En ég hélt 3 fyrirlestra, hvern öðrum betri og leið vel með þetta allt saman.
Svo gat ég athugað hvort Mastercard kort virkar í Svíþjóð - og viti menn - það gekk bara nokkuð vel.

Að standa með sjálfum sér.......

2004-12-02T13:01:00.000Z

Rosalega var ég stolt af sjálfri mér í gær. Ég tók mig til og stóð kyrfilega með sjálfi mér gagnvart manneskju sem hefur vaðið yfir fólk, á skítugum skónum - í langan tíma. Og mér leið svo vel á eftir - frábær tilfinning. Viðkomandi hefur haft það fyrir sið (þetta er auðvitað ekki satt, manneskjan er auðvitað mjög veikur - meðvirkur einstaklingur) að tala illa um fólk, ljúga og hagræða hlutum og heldur svo að enginn taki eftir því.
En í gær var mér nóg boðið þegar viðkomandi reyndi enn og aftur að "selja mér sannleika" sem bæði ég og aðrir vita er tómt bull.
Kannski segir þetta meira um mig - og minn bata í meðvirkninni - ég mæli með því að standa með sjálfum sér.

Áhyggjur og áhyggjuleysi

2004-11-17T13:34:00.000Z

Hafið þið tekið eftir því hvað það breytir litlu hvort við höfum áhyggjur eða ekki. Hlutir virðast gerast hvort heldur er. Ég er stundum svo áhyggjulaus að mér finnst það jaðra við kæruleysi. En svona er ég bara.
Tók þá afstöðu fyrir nokkrum árum að það breytir engu um niðurstöður - hvort ég er með í magapínu af kvíða, nagandi neglurnar og gnístandi tönnum. Það eina sem það hefur í för með sér er að ég ófríkka - og það er ekki gott!
Það sem hefur reynst mér best, er að trúa á æðri mátt (Hann gefur mér frí svona yfirleitt alla daga og sér um hlutina sjálfur) og treysta því að hlutirnir gangi eins vel og þeir virðast gera -yfirleitt. Og ef svo ólíklega vill til að hlutirnir ganga ekki upp - þá er bara að halda áfram. Passa sig bara á því að reyna ekki það sama aftur og aftur, eftir ca. 10-15 skipti væri gott að skipta um aðferð. Það ætti þá að vera sannað að sú aðferð gengur ekki...................

Snjóakstur og bílskúrar

2004-11-17T13:11:00.000Z

Mér finnst gaman að keyra í snjó. Það er bara þannig - samt er ég núna á bíl sem er ekki framhjóladrifinn, sjálfskiptur og í fyrsta sinn er ég með nelgd snjódekk. Fyrrverandi bílafloti hefur samanstaðið af framhjóladrifnum, beinskiptum og ekki nelgdum snjódekkjum - þ.e. að vetri til.
En mér er samt skemmt - nema við sköfun af framrúðum - það er ekki eins gaman.
Hvenær ætli verði búið að taka til í bílskúrnum - þannig að ég komin bílnum þar inn. Ég er líka búin að eiga marga bílskúra eða a.m.k. 3 síðustu 5 ár - og viti menn - bíllinn hefur aldrei farið inn í þessa bílskúra. Þar fyrir er alls konar dót - dót sem ég hef flutt með mér á milli heimila. Og ég veit að þið trúið því ekki - ég hef ekki hingað til þurft að nota neitt af þessu dóti.
Er að hugsa um að auglýsa í blöðum eftirfarandi: Tek að mér að flytja dót á milli bílskúra og kompa, fyrir lítinn pening. Geymið auglýsinguna.........................

Væntingar eru hættulegar

2004-11-17T12:31:00.000Z

Væntingar eru hættulegar - líklega hættulegasti hlutur í heimi. Þær grassera í hausnum á fólki, ímyndunaraflið fer í algjört stjórnleysi og útkoman þess vegna aldrei góð.
Besta ráðið við væntingum er líklega að læra - og kenna öðrum hugsunarlestur. Það er örugglega það eina sem gengur í málinu. Hvernig sem á það er litið eru ekki nein önnur ráð til staðar. Væntingar eru nefnilega bara í hausnum á okkur sjálfum. Þess vegna eru þetta væntingar - ekki eitthvað annað. Við erum að vonast til þess að einhver annar lesi hugsanir okkar, sjái það á okkur eða geti sér til um - hvað það er sem við viljum. Hvernig á það að vera hægt??
Svo þegar ekkert gengur fyrir hinn/hina að uppfylla okkar væntingar - þá förum við í fýlu út í viðkomandi, segjum ekkert og þá þarf hinn aðilinn aftur að fara á námskeiðið í hugsunarlestri svona til að skilja hvað er í gangi!
Hættum að hafa væntingar - tölum við fólk í kringum okkur, segjum hvað við viljum og hvað okkur finnst.
OG SÍÐAST EN EKKI SÍST - STÖNDUM MEÐ OKKUR SJÁLFUM